提升溝通意欲

溝通意欲 – 學習語言時的必需品

好多家長喺自己小朋友學習語言嘅階段都有唔少嘅「投訴」，例如：「我成日想教佢講嘢，但係佢都唔跟我講。」、「佢都唔答我問題。」、「佢成日都唔跟指令。」……

每個人學習新事物都需要動力，意欲就直接影響動力嘅多少。小朋友學習語言亦一樣，「溝通意欲」就係學習語言時嘅必需品。

作為言語治療師，經常都可以見到家長同自己小朋友玩，而呢啲時候好多時令我明白到點解家長有咁多以上提及過嘅投訴。好多時候家長同小朋友玩都係帶住一堆堆嘅學習目標，以下都係一啲經常出現嘅景象：
小朋友同媽媽玩緊煮飯仔，小朋友放咗個鑊係個爐上面，跟住切食物，媽媽就拎起唔同嘅食物問：「呢個咩黎架？咩黎架？要點架？呢個呢？」。十分鐘嘅煮飯仔遊戲，小朋友有小朋友煮佢嘅嘢食，媽媽有媽媽問佢嘅問題，成個過程小朋友同媽媽幾乎係零交流。

又或者

小朋友同媽媽砌Lego，媽媽一路砌就一路話：「不如我地砌城堡呀！」，然後見到小朋友並無跟住砌一樣嘅，就一路拆小朋友手上仲未成形嘅Lego一路話：「唔係咁砌呀，你望下媽咪個城堡，媽咪教你。」，然後就捉住小朋友嘅手砌城堡。又係短短嘅十分鐘，見唔到小朋友因為玩Lego嘅樂趣而出現嘅笑容，反而小朋友喺媽媽拆佢啲Lego嘅時候曾用叫聲控訴過。

前言好長，只因姑娘想家長們可以企係小朋友嘅角度去諗下。記住，小朋友玩玩具只有一個目的 – 開心！所以只要佢開心，佢自然就會更容易主動回應你。

要提升小朋友嘅「溝通意欲」，其中一樣武器就係「跟隨兒童的意願」(Follow the child’s lead)！

要「跟隨兒童的意願」嘅一大要點：觀察

無論係玩玩具、睇圖書、甚至只係搵緊嘢食，家長都要仔細觀察，睇下小朋友想做咩、想要咩。當你捕捉到小朋友當刻嘅意願，你嘅機會就黎啦！

舉個例子： 小朋友玩煮飯仔其實就係模擬緊日常生活嘅情節，家長只要根據小朋友當刻做緊嘅事情，俾一個合理嘅回應，配合小朋友，你就自然咁融入去個遊戲度。呢個過程你要觀察小朋友做緊咩、想做咩，然後自然地代入角色。同時，家長可以即時思考小朋友做緊嘅事情有咩係可以俾佢學習嘅。例如：小朋友扮食嘢，食完之後家長就可以嘗試配合事情去講：「食完啦？好好味！媽咪幫手洗碗啦！我洗紅色碗。」(根據事情合理嘅回應)，然後家長模擬開水喉洗碗，再拎起另外兩隻碗邀請小朋友：「你洗邊隻呀？」，係呢個自然嘅情況下，小朋友亦融入情景中，佢地就更容易回應你啦。

點解「跟隨兒童的意願」咁緊要？因為對於小朋友黎講，你地有共同嘅話題，你自然就變成一齊玩嘅友伴，再唔係老師甚至考官！或者，你下次係佢拎緊玩具焗爐入面嘅嘢食嘅時候，你講句：「小心熱熱呀！」，再順便吹下佢隻手仔，可能你會有意想不到嘅回應。